photos-and-more

ഒരു ജനല്‍ക്കാഴ്ച

Sat, 16 Oct 2010 16:36:57 +0100

ഒരു ജനല്‍ക്കാഴ്ച

താലിബാനും സ്ത്രീകളും

Sun, 10 Jan 2010 18:03:29 +0100

അഫ്ഘാനിസ്ഥാനിലെ താലിബാന്റെ നീതിബോധത്തിലെ മാതൃകാസ്ത്രീകൾ.

താലിബാൻ അധികാരത്തിൽ വന്നാൽ അഫ്ഘാനിസ്ഥാനിലെ തെരുവുകളിൽ ഇത്തരം ചാക്കുകെട്ടുകൾക്കു് മാത്രമേ നടക്കാൻ അനുവാദമുണ്ടാവൂ. അതു് താലിബാന്റെ കൽപന മാത്രമല്ല, അല്ലാഹുവിന്റെ ഇഷ്ടവുമാണു്. നിങ്ങൾക്കു് എന്തു് തോന്നുന്നു? എല്ലാ രാജ്യങ്ങളിലും താലിബാന്റെ ഭരണവും ദൈവത്തിന്റെ ഇഷ്ടവും നടപ്പിൽ വരേണ്ടതല്ലേ? സ്ത്രീകളുടെ അന്തസ്സും അഭിമാനവും ഉപ്പിലിട്ടുണക്കി ചാക്കിൽ പൊതിഞ്ഞു് സംരക്ഷിക്കാനുള്ള ബാദ്ധ്യത മനുഷ്യരാശിക്കുണ്ടെന്നാണെന്റെ പക്ഷം. പ്രത്യേകിച്ചും, ലോകാരംഭം മുതൽ വിശ്വാസത്തിന്റെ സംരക്ഷകർ എന്നഭിമാനിക്കുന്ന സ്ത്രീകൾ താലിബാന്റെ ദൈവരാജ്യം വരാനായി മുട്ടിപ്പായി പ്രാർത്ഥിക്കണം. ഒത്തുപിടിച്ചാൽ മത്തുപിടിക്കും എന്നോ മറ്റോ അല്ലേ?

സ്ത്രീ എന്നാൽ എന്തെന്നു് താലിബാനു് അല്ലാഹു വ്യക്തമായി വെളിപ്പെടുത്തിക്കൊടുത്തിട്ടുണ്ടു്: പുരുഷനു് വേണ്ടപ്പോഴെല്ലാം മന്ദഹാസത്തോടെ പൂമുഖവാതിൽ മലർക്കെ തുറന്നു് വിധേയയാവാൻ കടപ്പെട്ട ലൈംഗികയന്ത്രം, കൺവെയർ ബെൽറ്റിൽ നിന്നെന്നപോലെ തുരുതുരാ മക്കളെ പ്രസവിക്കേണ്ട പ്രസവയന്ത്രം, ബേബിസിറ്റർ യന്ത്രം, തൂപ്പുകാരി യന്ത്രം, പാചകക്കാരി യന്ത്രം, സ്വന്തം ശരീരത്തിന്റെ 'സ്വയംഭരണാവകാശത്തിൽ' അഭിമാനിക്കുന്നതിനു് പകരം ആരെയോ പേടിച്ചു് പർദ്ദച്ചാക്കിൽ സ്വയം മൂടിക്കെട്ടാൻ വിധിക്കപ്പെട്ട അഭിശപ്ത ജന്മങ്ങൾ! ഏറിയാൽ എഴുപതോ എൺപതോ വർഷങ്ങൾ മാത്രം ജീവിക്കാൻ കഴിയുന്നതിനിടയിൽ തന്നെപ്പറ്റിയോ, ഈ ലോകത്തെപ്പറ്റിയോ അറിയാനോ ജീവിതം ബോധപൂർവ്വം ആസ്വദിക്കാനോ, അതിനുവേണ്ട വിദ്യാഭ്യാസം നേടാനോ അവകാശമില്ലാത്ത, യാതൊരുവിധത്തിലുമുള്ള സ്വയംനിർണ്ണയാവകാശവുമില്ലാത്ത കുറേ മനുഷ്യജന്മങ്ങൾ! ചുരുക്കത്തിൽ, പുരുഷനു് യഥേഷ്ടം പന്തുപോലെ തട്ടിക്കളിക്കാനായി അല്ലാഹു ഉണ്ടാക്കിവിട്ടിരിക്കുന്ന കുറേ റബ്ബർ പാവകൾ! പുരുഷന്റെ ഒരു ഉപഭോഗവസ്തു. അതായിരിക്കണം താലിബാന്റെ അഭിപ്രായത്തിൽ സ്ത്രീകൾ! അങ്ങനെ അല്ലെന്നു് പറയാൻ ആരെങ്കിലും ധൈര്യപ്പെട്ടാൽ അവരെ പരസ്യമായി തലവെട്ടിയോ കല്ലെറിഞ്ഞോ കൊല്ലാൻ താലിബാനു് ദൈവം വെളിപാടിലൂടെ അധികാരം നൽകിയിട്ടുണ്ടു്. അതാണു് താലിബാന്റെ ഭാഷയിൽ സമാധാനം.

സൃഷ്ടിച്ചപ്പോഴേ എന്തുകൊണ്ടു് അല്ലാഹു സ്ത്രീകളെ പർദ്ദയിൽ പൊതിഞ്ഞില്ല എന്നെനിക്കറിയില്ല. അല്ലാഹുവിന്റെ കൈവശം പർദ്ദ തയ്ക്കാൻ പറ്റിയ ചാക്കുതുണി ഇല്ലായിരുന്നിരിക്കാം. നിരപരാധികളായ മനുഷ്യരെ ബോംബിനു് ഇരയാക്കി നരകത്തിലേക്കയക്കുന്ന 'രക്തസാക്ഷികൾ' കാമവെറിപൂണ്ടു് സ്വർഗ്ഗത്തിൽ എത്തുന്നതും നോക്കി 'തുണിയും കോണകവും' ഇല്ലാതെ കാത്തിരിക്കുന്ന നിത്യകന്യകകൾ മാത്രമല്ലേയുള്ളു സ്വർഗ്ഗത്തിൽ! രാവിലെ മുതൽ വൈകിട്ടു് വരെയും വൈകിട്ടു് മുതൽ രാവിലെ വരെയും നിർത്താതെ തീറ്റയും കുടിയും ലിംഗം കൊണ്ടുള്ള റെസിപ്രൊക്കേഷനുമല്ലാതെ കാര്യമായ മറ്റു് കാര്യപരിപാടികളൊന്നുമില്ലാതെ വിശ്വാസികൾ മരണാനന്തരം 'ജീവിതം' ആസ്വദിക്കുന്ന പറുദീസയെ ആണല്ലോ നമ്മൾ സ്വർഗ്ഗം എന്നു് വിളിക്കുന്നതു്. മറ്റുവിധത്തിൽ പറഞ്ഞാൽ, ഭൂമിയിൽ വച്ചു് ചെയ്താൽ പാപവും പൈശാചികവും ആവുമായിരുന്ന കാര്യങ്ങൾ ദൈവത്തിന്റെ തിരുമുറ്റത്തു്, ദൈവത്തിന്റെ മൂക്കിനു് കീഴെ ലജ്ജയുടെ ഒരു നുറുങ്ങുപോലും ആവശ്യമില്ലാതെ ആടിത്തിമിർക്കുന്നതിനാണു് വിശ്വാസി ഭൂമിയിൽ വച്ചുതന്നെ ടിക്കറ്റുവാങ്ങുന്നതു്. "തൂറാത്തവൻ തൂറിയപ്പോൾ തീട്ടം കൊണ്ടു് ആറാട്ടു്" എന്നപോലെ വെറിപൂണ്ട അത്തരം അരങ്ങേറ്റങ്ങൾക്കിടയിൽ പർദ്ദയും തുണിയുമൊക്കെ തടസ്സമേ ആവൂ.

ഓ! ഞാൻ മറന്നു! ചില കാര്യങ്ങൾ മനുഷ്യരെ 'നയിക്കുന്നവർ' റ്റബൂ ആക്കിയിട്ടുണ്ടു്. അവ പറയാൻ മനുഷ്യർക്കു് അവകാശമില്ല. "ഞങ്ങൾ ഇവിടെ എങ്ങനെയോ എത്തിച്ചേർന്നു. ഇവിടത്തെ ഇരുപ്പു് സുഖകരമാണു്. ഞങ്ങൾക്കു് എന്നാളും ഇവിടെത്തന്നെ ഇരിക്കണം. അതു് സാദ്ധ്യമാവാൻ താഴെനിന്നു് ആർപ്പു് വിളിക്കുന്ന മനുഷ്യർ ചില കാര്യങ്ങൾ ഒരിക്കലും അറിയാതിരിക്കണം, പറയാതിരിക്കണം". മേൽത്തട്ടിന്റെ ഈ ലക്ഷ്യം നേടുന്നതിനാണു് റ്റബൂകൾ സൃഷ്ടിക്കപ്പെടുന്നതു്. അർഹതയില്ലാത്ത അധികാരശക്തി മനുഷ്യനെ തെറ്റിദ്ധരിപ്പിക്കാനായി ഊതി ഉയർത്തുന്ന മിസ്റ്റിഫിക്കേഷന്റെ പുകമറ നീങ്ങിയാൽ ദൈവികതയുടെ ഒരുപാടു് ചില്ലുകൊട്ടാരങ്ങൾ തകർന്നു് വീഴും. അവിടങ്ങളിലെ സിംഹാസനങ്ങളിലും ഭദ്രാസനങ്ങളിലും ആസനസ്ഥരായവരുടെ ആസനങ്ങളിൽ ആയിരം മൊട്ടുസൂചികൾ തറച്ചുകയറുന്ന പോലുള്ള ഒരനുഭവമായിരിക്കും ഡീമിസ്റ്റിഫിക്കേഷൻ വഴി സംഭവിക്കുന്നതു്. സഹസ്രാബ്ദങ്ങളായി മതങ്ങളുടെ പുകമറയിലൂടെ മാത്രം കാര്യങ്ങൾ കണ്ടു് ശീലിച്ചവർക്കു് സ്വതന്ത്രചിന്തയുടെ കണ്ണഞ്ചിപ്പിക്കുന്ന വെളിച്ചം അസഹ്യമായിരിക്കും. അവർക്കു് സ്വാഭാവികമായും പഴയ അന്ധകാരം തന്നെയാവും ആകർഷണീയം. പക്ഷേ, മുന്നോട്ടു് പോകാൻ ആഗ്രഹിക്കുന്നവർക്കു് എല്ലാത്തരം പുകമറകളെയും നശിപ്പിച്ചുകൊണ്ടല്ലാതെ യാത്ര സാദ്ധ്യമാവില്ല.

സ്കൂളിൽ പോയതിന്റെ പേരിൽ അല്ലാഹുവിന്റെ ആരാച്ചാരന്മാർ ആസിഡ്‌ കോരിയൊഴിച്ചു് പൊള്ളിച്ച ഒരു പെൺകുട്ടിയുടെ മുഖം.

ദൈവം എന്ന കരുണാനിധി

Fri, 16 Oct 2009 15:44:16 +0100

ആഫ്രിക്കയിൽ നിന്നും ചില ചിത്രങ്ങൾ

ചെളിക്കുഴിയിൽ നിന്നും വെള്ളം ശേഖരിക്കുന്ന പെൺകുട്ടി

വെപ്പും കുടിയും കിടപ്പും പുറത്തുതന്നെ

കാൽപാദം കഴുകൽ 'ചടങ്ങു്'

കാൽ കഴുകിയ 'വിശുദ്ധജലം' ശേഖരിക്കുന്നവർ

കാൽ കഴുകിയ വെള്ളം കുടിക്കുന്ന ഒരു സ്ത്രീ

ഇനി പറയൂ: ദൈവം വലിയവനും സർവ്വശക്തനും കരുണാനിധിയും അവനിൽ വിശ്വസിക്കുന്നവർക്കു് എല്ലാം വാരിക്കോരി കൊടുക്കുന്നവനുമല്ലേ?

പ്രകൃതിഭംഗി

Fri, 16 Oct 2009 15:54:33 +0100

1. മഞ്ഞുമലകള്‍ക്കു് ദര്‍ശനം നല്‍കുന്ന സൂര്യന്‍

2. കുശലം പറയുന്ന കരയും കടലും

യേശുവും കുടുംബവും ...

Mon, 05 Oct 2009 16:58:50 +0100

ഫ്ലോറിഡക്കാരിയായ Pamela Latrimore എന്നൊരു 42 വയസ്സുകാരിയുടെ തലച്ചോറു് Magnet Resonance Scanning-നു് വിധേയമാക്കിയപ്പോള്‍ ആ ചിത്രത്തില്‍ തലച്ചോറിന്റെ രണ്ടു് പാര്‍ശ്വങ്ങളുടെയും ഇടയിലായി അതാ ഇരിക്കുന്നു വിശുദ്ധ കന്യകമറിയം! ദൈവം തന്റെ പ്രാര്‍ത്ഥന കേട്ടതിന്റെ തെളിവാണു് അതെന്ന കാര്യത്തില്‍ യൂട്ടെറസ്‌ ക്യാന്‍സര്‍ രോഗിണിയായ ആ സ്ത്രീക്കു് പിന്നെ സംശയമൊന്നും ഉണ്ടായിരുന്നില്ലത്രെ! ആരറിഞ്ഞു: ഒരുപക്ഷേ വിശുദ്ധ അല്‍ഫോന്‍സാമ്മയുടെ ഫോട്ടോ കുറെനാള്‍ കണ്ടു് ശീലിച്ചുകഴിയുമ്പോള്‍ കിടക്കവിരികളിലെയും വസ്ത്രങ്ങളിലെയുമൊക്കെ കറയിലും ചെളിയിലും വിശ്വാസികള്‍ അല്‍ഫോന്‍സാമ്മയുടെ മുഖവും തിരിച്ചറിയാന്‍ തുടങ്ങിയേക്കാം!

ജനല്‍പ്പാളിയില്‍ പ്രത്യക്ഷപ്പെടുന്ന യേശു

ഒര്‍ലാന്‍ഡോയിലെ Seventh Day Adventist ആശുപത്രിയുടെ ചാപ്പലിന്റെ ജനല്‍പ്പാളിയില്‍ യേശുവിന്റെ രൂപം 'അതിനിഗൂഢമായി' പ്രത്യക്ഷപ്പെടുന്നു. ആ ആശുപത്രിക്കു് ദൈവികമായ എന്തോ 'ശക്തി' ഉണ്ടെന്ന കാര്യത്തില്‍ അവിടെ കഴിയുന്ന രോഗികള്‍ക്കു് നല്ല ഉറപ്പാണത്രെ!

ഭിത്തിയില്‍ വെളിപ്പെടുന്ന മറിയം

കാലിഫോര്‍ണിയയിലുള്ള ഒരു കണ്ണടവ്യാപാരി 2006-ല്‍ തന്റെ ഓഫീസിന്റെ ഭിത്തിയില്‍ കന്യകമറിയത്തെ കണ്ടപ്പോള്‍ അവനു് തന്റെ കണ്ണുകളെ വിശ്വസിക്കാന്‍ കഴിഞ്ഞില്ല. കഴിഞ്ഞ വര്‍ഷം മയാമിയില്‍ ഒരു വാള്‍ പേപ്പറില്‍ വിശുദ്ധകുടുംബം മുഴുവനായി പ്രത്യക്ഷപ്പെട്ടിരുന്നു പോലും! അമേരിക്കയില്‍ സ്ഥിരതാമസം ആക്കിയസ്ഥിതിക്കു് വിശുദ്ധകുടുംബത്തിനു് ജോര്‍ജ്‌ ബുഷ്‌ 'അമേരിക്കന്‍ ഗ്രീന്‍ കാര്‍ഡ്‌' നല്‍കിക്കാണും!

പൊട്ടേറ്റൊ ചിപ്സില്‍ “അവതരിക്കുന്ന” യേശു

പൊട്ടേറ്റോ ചിപ്സില്‍ വരെ യേശു മുഖം കാണിച്ചത്രേ! ഫ്ലോറിഡക്കാരിയായ ഒരു സ്ത്രീ ചിപ്സ്‌ വായിലേക്കു് വയ്ക്കാന്‍ തുടങ്ങിയപ്പോള്‍ യേശുവിനെ കാണുകയായിരുന്നു! ഭാഗ്യം എന്നല്ലാതെ എന്തു്പറയാന്‍? യേശുവിനെ ചവച്ചരച്ചു് വിഴുങ്ങിയിരുന്നെങ്കില്‍! ഹോ!

(കടപ്പാടു്: MSN, ZoomIn)

കാഴ്ചയിലെ മിഥ്യാബോധം

Mon, 05 Oct 2009 16:16:18 +0100

പഞ്ചേന്ദ്രിയങ്ങളിലൂടെ തലച്ചോറില്‍ എത്തുന്ന കാര്യങ്ങളെ അതുവരെ അവിടെ സംഭരിക്കപ്പെട്ടിരിക്കുന്ന വിവരങ്ങളിലെ അനുയോജ്യമായവയുമായി താരതമ്യം ചെയ്യുന്നതുവഴിയാണല്ലോ നമ്മുടെ അനുഭവങ്ങളും അതിനനുസരിച്ചുള്ള തീരുമാനങ്ങളും ഉണ്ടാവുന്നതു്. നമ്മള്‍ ചെയ്യുന്നതും അനുഭവിക്കുന്നതുമായ ഓരോ കാര്യങ്ങളും അതുവഴി നമുക്കു് ലഭിക്കുന്നതു് രസമോ വേദനയോ, സംതൃപ്തിയോ അസന്തുഷ്ടതയോ, വിജയമോ പരാജയമോ എന്നതിന്റെ അടിസ്ഥാനത്തില്‍ തലച്ചോറില്‍ വിലയിരുത്തപ്പെടുകയും തലച്ചോറിന്റെ തന്നെ ഭാഗമായ ഓര്‍മ്മയുടെ കേന്ദ്രത്തില്‍ ശേഖരിക്കപ്പെടുകയും ചെയ്യുന്നു. അനുഭവങ്ങള്‍ പെരുകുന്തോറും ഈ ശേഖരവും വളര്‍ന്നുകൊണ്ടിരിക്കും - സങ്കല്‍പാതീതവും ഭീമവുമായ അളവില്‍! അതുപോലെതന്നെ, തലച്ചോറിനു് അതിന്റേതായ ഓട്ടോമറ്റിസവും ഉണ്ടു്. പരിചയമില്ലാത്ത ഒരു മുറിയിലോ ഒരു വീട്ടിലോ ചെല്ലുമ്പോഴോ, അല്ലെങ്കില്‍ അന്യരെ പരിചയപ്പെടേണ്ടിവരുമ്പോഴോ ഒക്കെ വീണ്ടും കണ്ടാല്‍ തിരിച്ചറിയാന്‍ ഉതകുന്ന ചില “സവിശേഷതകള്‍” ഓട്ടോമാറ്റിക്‌ ആയി തലച്ചോറില്‍ ശേഖരിക്കപ്പെടുന്നു. ഒരു സുഹൃത്തിനെയോ, ബന്ധുവിനേയോ കാണുമ്പോള്‍ “ഒറ്റനോട്ടത്തില്‍” അവരെ തിരിച്ചറിയാന്‍ നമുക്കു് കഴിയുന്നതും അതുകൊണ്ടാണു്. വീണ്ടും കാണുന്ന ഓരോ പരിചിതരേയും ഓരോ പ്രാവശ്യവും ആപാദചൂഡം കൂലങ്കഷമായി പരിശോധിച്ചാലേ തിരിച്ചറിയാന്‍ കഴിയൂ എന്നുവന്നാല്‍ ജീവിതം തന്നെ അസാദ്ധ്യമായിരുന്നേനെ!

മനുഷ്യജീവിതം ഈവിധം ലഘൂകരണത്തിലൂടെ സാദ്ധ്യമാക്കുന്ന തലച്ചോറിന്റെ ഈ കുറുക്കുവഴി മിക്കവാറും എല്ലായ്പോഴും കാര്യക്ഷമമായി പ്രവര്‍ത്തിക്കാറുമുണ്ടു്. പക്ഷേ, പല സന്ദര്‍ഭങ്ങളിലും തലച്ചോറില്‍ എത്തുന്ന ഇന്ദ്രിയാനുഭവങ്ങളുടെ അടിസ്ഥാനത്തിലുള്ള നിഗമനങ്ങള്‍ യാഥാര്‍ത്ഥ്യവുമായി പൊരുത്തപ്പെടാറില്ല. ലോകത്തെ “തിരിച്ചറിയാന്‍” ഏറ്റവും കൂടുതല്‍ ഉപയോഗിക്കപ്പെടുന്നതു് കണ്ണുകള്‍ ആണെന്നതിനാല്‍, ദര്‍ശനം വഴി തലച്ചോറില്‍ എത്തുന്ന വിവരങ്ങളുടെ വിലയിരുത്തലിലാണു് അധികപങ്കു് പിശകുകളും സംഭവിക്കുന്നതു്. ഈ പ്രശ്നത്തെ പൊതുവേ “ഒപ്ടിക്കല്‍ ഇല്യൂഷന്‍” എന്നു് വിളിക്കാറുണ്ടെങ്കിലും, സത്യത്തില്‍ പിശകു് പറ്റുന്നതു് നേത്രങ്ങള്‍ക്കല്ല, അവയെ വ്യാഖ്യാനിക്കുന്ന തലച്ചോറിനാണു്.

രസകരമായ ചില ഉദാഹരണങ്ങള്‍:

തിരകളോ? വക്രതയോ?

ഈ ചിത്രത്തില്‍ വെളുത്തതുംകറുത്തതുമായ ചതുരങ്ങള്‍ക്കു് രൂപം നല്‍കുന്ന നെടുകെയും കുറുകെയുമുള്ള രേഖകള്‍ എല്ലാം കൃത്യമായി നേരെയാണു്. എങ്കിലും അവ കാണുന്ന നമ്മളില്‍ അവ വക്രാകൃതിയിലാണെന്ന തോന്നല്‍ ഉണ്ടാവുന്നു.

വിചിത്രമായ കറക്കം

മുന്നോട്ടും പിറകോട്ടും തല ചലിപ്പിച്ചുകൊണ്ടു് ഈ ചിത്രത്തെ നോക്കിയാല്‍ ഈ രണ്ടു് വൃത്തങ്ങളും കറങ്ങാന്‍ തുടങ്ങുന്നതുപോലെ തോന്നും.

ചാരനിറങ്ങളിലെ മിഥ്യാബോധം

അങ്ങനെ തോന്നുന്നില്ലെങ്കിലും: A, B എന്നു് അടയാളപ്പെടുത്തിയിരിക്കുന്ന രണ്ടു് ചതുരങ്ങളുടെയും നിറം ഒന്നുതന്നെയാണു്. അവ രണ്ടു് വ്യത്യസ്ത നിറങ്ങളായി നമുക്കു് തോന്നുന്നതിനു് കാരണം, നമ്മുടെ തലച്ചോറു് നിറങ്ങളെ നിഴലും വെളിച്ചവും അടിസ്ഥാനമാക്കിയാണു് '“വ്യാഖ്യാനിക്കുന്നതു്” എന്നതിനാലാണു്.

ചെറിയ സ്ത്രീകള്‍, വലിയ സ്ത്രീകള്‍!

ചിത്രത്തിലെ മുന്‍വശത്തെ സ്ത്രീകള്‍ പിന്‍വശത്തെ സ്ത്രീകളെ അപേക്ഷിച്ചു് വളരെ ചെറുതായി തോന്നുന്നു. പക്ഷേ ആ മൂന്നു് ജോഡികളുടെയും വലിപ്പം (അളവുകള്‍) തുല്യമാണു്. സ്തംഭങ്ങളുടെ ഇടയിലൂടെ പോകുന്നതുവഴി നമ്മുടെ തലച്ചോറില്‍ “ആഴം” എന്ന തോന്നല്‍ ഉളവാക്കപ്പെടുന്നതാണു് കാരണം.

ചതുരക്കട്ടയെന്ന മിഥ്യാബോധം

ഈ ചിത്രത്തിലും ഇല്ലാത്ത ഒരു വസ്തുവിനെ “കാണാന്‍” നമുക്കു് കഴിയും. കറുത്ത വൃത്തങ്ങളിലൂടെയുള്ള വെളുത്ത രേഖകള്‍ ഒരു ചതുരക്കട്ടയുടെ തോന്നല്‍ നമ്മില്‍ ജനിപ്പിക്കുന്നു.

“സൗന്ദര്യം നശ്വരമാണു്”

കണ്ണാടിയില്‍ നോക്കുന്ന ഒരു സ്ത്രീയെയോ, അല്ലെങ്കില്‍ ഒരു തലയോട്ടിയോ ഈ ചിത്രത്തില്‍ വീക്ഷിക്കാന്‍ കഴിയും. (C. Allan Gilbert-ന്റെ 'All Is Vanity' എന്ന ഡ്രോയിംഗ്‌)

ഗോളവലിപ്പമിഥ്യാബോധം

വലിപ്പബോധവും ആപേക്ഷികമാണു്. ചിത്രത്തിലെ രണ്ടു് നീലഗോളങ്ങളും വ്യത്യസ്ത വലിപ്പമുള്ളവയായി തോന്നുന്നെങ്കിലും അവയുടെ അളവുകള്‍ തുല്യമാണു്.

ഇങ്ങനെയൊക്കെയാണു് നമ്മുടെ “അനുഭവങ്ങളുടെ” യഥാര്‍ത്ഥ സ്ഥിതി! ദര്‍ശനങ്ങളെപ്പറ്റിയും, വെളിപാടുകളെപ്പറ്റിയും, അത്ഭുതങ്ങളെപ്പറ്റിയുമൊക്കെയുള്ള സംഭ്രമജനകമായ വാര്‍ത്തകള്‍ കേള്‍ക്കുമ്പോള്‍ അവയോടൊപ്പം ഈ വസ്തുത കൂടി കൂട്ടിച്ചേര്‍ത്തു് ചിന്തിച്ചാല്‍ ഏറെ അബദ്ധങ്ങള്‍ ഒഴിവാക്കാം. കാണുന്ന കാര്യങ്ങളുടെ‍ തന്നെ സത്യസ്ഥിതി നിസ്സംശയം അറിയാന്‍ കഴിയാത്ത മനുഷ്യന്‍ കാണാത്തവയെപ്പറ്റി പൂര്‍ണ്ണമായ അറിവു് അവകാശപ്പെടുന്നതു് രസകരം എന്നേ പറയാനുള്ളു. വെളിപാടുകളില്‍‍ അധിഷ്ഠിതമായ മതങ്ങളില്‍‍ ഇത്തരം അത്ഭുതങ്ങള്‍ക്കു് യാതൊരു പഞ്ഞവുമില്ല. ചില മനുഷ്യര്‍ അവര്‍ക്കു് ദൈവം വെളിപ്പെട്ടു എന്നും, ഇങ്ങനെയോ അങ്ങനെയോ ഉള്ള ഏതാനും കല്‍പനകള്‍ നല്‍കിയെന്നും, അവ അക്ഷരം പ്രതി അനുസരിക്കാന്‍ മനുഷ്യര്‍ ബാദ്ധ്യസ്ഥരാണെന്നും, തങ്ങളെ അതിനു് ചുമതലപ്പെടുത്തിയെന്നും ഒക്കെ പറയുന്നതു് സാമാന്യബുദ്ധിയുടെ അടിസ്ഥാനത്തില്‍ ഒന്നുകില്‍ 'optical illusion' പോലുള്ള മസ്തിഷ്കഭൂതങ്ങള്‍, അല്ലെങ്കില്‍ ജനങ്ങളെ നിയന്ത്രിക്കാന്‍, ഭയപ്പെടുത്താന്‍, ഭരിക്കാന്‍, ചൂഷണം ചെയ്യാന്‍, ബാഹ്യശക്തികള്‍ക്കെതിരായി ഒറ്റക്കെട്ടായി അവരെ അണിനിരത്തുവാന്‍ ഒക്കെയായി മനഃപൂര്‍വ്വം കെട്ടിച്ചമച്ച ഭാവനാസൃഷ്ടികള്‍ മാത്രം! പക്ഷേ, ഇത്തരം വെളിപാടുകള്‍ ഉണ്ടായവര്‍ ശക്തരും, സമൂഹത്തില്‍ സ്വാധീനം ഉള്ളവരും ആണെങ്കില്‍ ഭയപ്പെടുത്തിയും, ആയുധശേഷി ഉപയോഗിച്ചു് ഈ മണ്ടത്തരങ്ങളെ എതിര്‍ക്കുന്നവരെ കൊന്നൊടുക്കിയും അവരുടെ “ദര്‍ശനങ്ങള്‍” ജനങ്ങളില്‍ അടിച്ചേല്‍പിക്കാന്‍ അവര്‍ക്കു് ബുദ്ധിമുട്ടുണ്ടാവില്ല. കാലങ്ങള്‍ കഴിയുന്തോറും ഇത്തരം മസ്തിഷ്കഭൂതങ്ങള്‍ക്കു് ചോദ്യം ചെയ്യാന്‍ പാടില്ലാത്ത ദൈവികതയും വിശുദ്ധിയും ലഭിക്കും. ഈ “സനാതനസത്യം” ഇല്ലാതെ ജീവിതം അസാദ്ധ്യമാണെന്ന തോന്നല്‍ വരെ അതിനുകീഴില്‍ ജീവിക്കാന്‍ വിധിക്കപ്പെട്ട മനുഷ്യര്‍ക്കുണ്ടാവും.

വളര്‍ത്തല്‍ വഴിയും, സമുദായത്തിലെ നിത്യാനുഭവങ്ങള്‍ വഴിയും മനുഷ്യരില്‍ ഈ അവസ്ഥ സൃഷ്ടിക്കുന്നതും ഓര്‍മ്മയില്‍ ശേഖരിക്കുന്നതും തലച്ചോറിലെ ആദ്യം സൂചിപ്പിച്ച ഓട്ടോമാറ്റിസം തന്നെ! ഒരിക്കല്‍ ശേഖരിക്കപ്പെട്ടുകഴിഞ്ഞാല്‍ പിന്നെ മനുഷ്യരുടെ ബോധപൂര്‍വ്വമായ പങ്കാളിത്തം ആവശ്യമില്ലാത്തവിധം തലച്ചോറു് അതിന്റെ നിയന്ത്രണം ഏറ്റെടുക്കുന്നു. മനുഷ്യരുടെ തലച്ചോറിലേയും ശരീരത്തിലേയും അധികപങ്കു് ചുമതലകളും പ്രവൃത്തികളും അടിസ്ഥാനപരമായി നമ്മുടെ ബോധപൂര്‍വ്വമായ പങ്കാളിത്തം ഇല്ലാതെയാണു് സംഭവിക്കുന്നതു്. സൈക്കിള്‍ ഓടിക്കാനും കാര്‍ ഡ്രൈവ് ചെയ്യാനുമെല്ലാം പഠിക്കുന്നതിനു് ആരംഭത്തില്‍ നമ്മുടെ ബോധപൂര്‍വ്വമായ പങ്കാളിത്തം തീര്‍ച്ചയായും ആവശ്യമാണു്. പക്ഷേ, ഒരിക്കല്‍ ശീലിച്ചുകഴിഞ്ഞാല്‍ പിന്നെ ഈ പ്രവര്‍ത്തികളുടെ നിയന്ത്രണം തലച്ചോറു് സ്വയമേവ ഏറ്റെടുക്കുന്നു. അതിനുശേഷം അവയില്‍ ബോധപൂര്‍വ്വം “ഇടപെടേണ്ട” ആവശ്യമില്ലെന്നു് മാത്രമല്ല, അങ്ങനെ ചെയ്യുന്നതു് പലപ്പോഴും ആ പ്രവര്‍ത്തികളുടെ സുഗമതയെ തടസപ്പെടുത്തി എന്നും വരാം.

കടപ്പാടു്: MSN, GNU, Public Domain (മുന്‍‌പു് കണ്ടിട്ടുള്ളവര്‍ ക്ഷമിക്കുക.)

ചാരനിറങ്ങളിലെ മിഥ്യാബോധം എന്ന ചിത്രത്തിലെ A, B എന്നീ ഭാഗങ്ങള്‍ മാത്രം മുറിച്ചെടുത്തതു് താഴെ. ആ ചിത്രത്തിലെ നിഴലാണു് തലച്ചോറിനെ തെറ്റിദ്ധരിപ്പിക്കുന്നതു്.

നവവത്സരാശംസകള്‍

Fri, 16 Oct 2009 15:58:21 +0100

എല്ലാ സുഹൃത്തുക്കള്‍ക്കും സ്നേഹവും സമാധാനവും ഭാഗ്യവും നിറഞ്ഞ ഒരു പുതിയ വര്‍ഷം ആശംസിക്കുന്നു.

മഞ്ഞുപെയ്യുംകാലം

Fri, 16 Oct 2009 16:02:25 +0100

കന്യാചര്‍മ്മപരിശോധന

Mon, 05 Oct 2009 14:54:05 +0100

തെക്കേ ആഫ്രിക്കയിലെ കറുത്ത വര്‍ഗ്ഗക്കാരുടെ ഒരു ഗോത്രത്തില്‍ വിവാഹം കഴിക്കാന്‍ പുരുഷന്‍ വധുവിന്റെ കുടുംബത്തിനു് പ്രതിഫലം നല്‍കണം. അതു് പത്തോ പതിനൊന്നോ പശുക്കള്‍ വരെ ആവാം. വധുവിന്റെ വില വര്‍ദ്ധിപ്പിക്കുന്ന ഒരു പ്രധാനഘടകമാണു് അവളുടെ കന്യകാത്വം. കന്യകാത്വത്തിന്റെ വ്യക്തമായ ഒരു തെളിവു് ഊനം തട്ടാത്ത കന്യാചര്‍മ്മമാണെന്നതിനാല്‍ പെണ്‍കുട്ടികള്‍ അവരുടെ കന്യാചര്‍മ്മം പരിശോധിപ്പിച്ചു് സര്‍ട്ടിഫിക്കറ്റ്‌ വാങ്ങാന്‍ ശ്രമിക്കുന്നു. ഇത്രയേറെ പശുക്കളെ സമ്പാദിക്കുക എന്നതു് അവരുടെയിടയിലെ ആണൊരുത്തനു് അത്ര എളുപ്പം സാധിക്കാവുന്ന ഒരു കാര്യമല്ല എന്നതിനാല്‍ വിവാഹവും പലപ്പോഴും താമസിച്ചേ നടത്താനാവൂ. അതിനാല്‍ ഒരു പെണ്‍കുട്ടി 'കന്യകാത്വം-കം-കന്യാചര്‍മ്മ-യഥാസ്ഥാന-ഊനമില്ലായ്മ-സര്‍ട്ടിഫിക്കറ്റ്‌' വാങ്ങി ട്രങ്കില്‍ സൂക്ഷിച്ചാലും, ഒരുത്തന്‍ ഒരുദശം പശുക്കളുമായി അവളെത്തേടി എത്തുമ്പോഴേക്കും ഏതാനും വര്‍ഷങ്ങള്‍ കൊഴിഞ്ഞുവീണു് കഴിഞ്ഞിരിക്കാമെന്നതും സാധാരണമാണു്. ഈ കാലഘട്ടത്തില്‍ കന്യാചര്‍മ്മത്തിനു് ഭംഗം സംഭവിച്ചുകൂടെന്നില്ലല്ലോ എന്ന ചോദ്യം അധികപ്രസംഗമാണു്. അധികപ്രസംഗം ആഫ്രിക്കക്കാരുടെ ഇടയില്‍ മര്യാദയല്ലാത്തതിനാല്‍ ഈ ചോദ്യം ആരും ചോദിക്കുന്ന പതിവില്ല. ആ ഒറ്റക്കാരണത്തിന്റെ പേരിലാണു് അവരുടെ ഇടയില്‍ കേരളത്തിലേതുപോലെ hymen restoration surgery എന്നൊരു ഏര്‍പ്പാടു് നിലവിലില്ലാത്തതു്. പരാതിയില്ലാത്തിടത്തു് കോടതി എന്തിനു്? പക്ഷേ, പരാതിയുള്ളിടത്തു് ജഡ്ജി നിഷ്പക്ഷനല്ലെങ്കില്‍ കോടതി ഉള്ളതിനേക്കാള്‍ ഭേദം ഇല്ലാത്തതുതന്നെയാവും! നീതിന്യായവ്യവസ്ഥ നിലനിര്‍ത്താന്‍ ജനങ്ങള്‍ നികുതിപ്പണം നല്‍കി നിയമജ്ഞരെ നിയമിക്കുന്നതു് അനീതി കൊയ്യാനാണെങ്കില്‍ അത്തരം ഒരേര്‍പ്പാടു് അസംബന്ധം എന്നേ വരൂ!

1. കന്യാചര്‍മ്മപരിശോധനക്കായി പെണ്‍കുട്ടികള്‍ ക്യൂ നില്‍ക്കുന്നു.

2. ഇതാണു് ഞങ്ങളുടെ നാട്ടുനടപ്പു്. എന്തിനു് എതിര്‍ക്കണം എന്നറിയില്ല. ഗോത്രത്തിന്റെ ചിട്ടകളെ എതിര്‍ക്കാന്‍ ഞങ്ങളാരു്?

3. കന്യാചര്‍മ്മ പരിശോധന വിജയകരമായി പൂര്‍ത്തിയാക്കിയതിന്റെ ഒരു തെളിവാണു് നെറ്റിയിലെ വെളുത്ത അടയാളം.

'കന്യകാത്വം-കം-കന്യാചര്‍മ്മ-യഥാസ്ഥാന-ഊനമില്ലായ്മ-സര്‍ട്ടിഫിക്കറ്റ്‌'

കേരളത്തിലെ മണവാളന്റെ ബിരുദവും മണവാട്ടിയുടെ കുടുംബം നല്‍കേണ്ട സ്ത്രീധനവുമായി ഈ ഏര്‍പ്പാടിനു് സാമാന്യത്തിലധികമായ സാമ്യമുണ്ടു്. ഈ രണ്ടു് ഏര്‍പ്പാടുകളിലും ആണിനെയും പെണ്ണിനെയും സ്ഥാനം മാറ്റി പ്രതിഷ്ഠിക്കണം എന്നേയുള്ളു. രണ്ടു് ബിരുദങ്ങളുടെയും ഫാക്കള്‍ട്ടികള്‍ തമ്മില്‍ അല്ലറ ചില്ലറ വ്യത്യാസമുണ്ടാവാമെങ്കിലും അതത്ര കാര്യമാക്കേണ്ട കാര്യമല്ല. ഏതു് ഫാക്കള്‍ട്ടികളിലൊക്കെയാണു് തങ്ങള്‍ ബിരുദമെടുത്തിരിക്കുന്നതെന്നും, അവയുടെ ഒക്കെ അര്‍ത്ഥമെന്തെന്നും ഇക്കാലത്തു് മഹാപുരോഹിതന്മാര്‍ക്കുപോലും അറിയില്ല. പിന്നെയാണു് കേരളത്തിലെ സാദാ ബിരുദധാരികളും ആഫ്രിക്കയിലെ അക്ഷരാഭ്യാസമില്ലാത്ത മണവാട്ടികളും! കേരളമെന്താ ചോദിക്കാനും പറയാനും ആരുമില്ലാത്ത ബനാന റിപ്പബ്ലിക്കോ?

പശുക്കളുടെ എണ്ണം ഒപ്പിക്കുവാന്‍ പുരുഷന്മാര്‍ പട്ടണങ്ങളില്‍ എന്തെങ്കിലുമൊക്കെ ജോലിക്കു് പോകുന്നു. അവരില്‍ നല്ലൊരു പങ്കു് - എട്ടുപത്തു് പശുക്കളെ കൊടുത്താല്‍ ഭാവിയില്‍ കിട്ടുന്നതു് എന്താണെന്നു് മുന്‍കൂട്ടി അറിയാനാവാം - പലപ്പോഴും താരതമ്യേന പശുക്കളേക്കാള്‍ വിലക്കുറവുള്ള വേശ്യകളെ സമീപിക്കുന്നു. 'വില തുച്ഛം, മണം മെച്ചം!' ഒരു തോട്ടി വാങ്ങിയാല്‍ ഒരാന സൗജന്യം എന്നപോലെ 'പത്തുരൂപ' മുടക്കി ഏതിനെ എടുത്താലും, സൗജന്യമായി ലഭിക്കുന്ന AIDS-മായി അവന്‍ സ്വന്തം ഗ്രാമത്തിലെത്തി പെണ്ണുകെട്ടുമ്പോള്‍ പശുക്കളെ മാത്രമല്ല, എയ്ഡ്സും അവള്‍ക്കു് നല്‍കുന്നു. അവര്‍ രണ്ടുപേരും ഇഹലോകത്തോടു് വിടപറയുന്നതു് എന്നാണെന്നറിയാന്‍ പിന്നെ ദിവസങ്ങള്‍ എണ്ണിയാല്‍ മതി. ലൈംഗികരോഗങ്ങളെപ്പറ്റി സംസാരിക്കുന്നതു് അതുപോലുള്ള മനുഷ്യരുടെ ഇടയില്‍ റ്റബൂ ആയതിനാല്‍ ഈ പ്രശ്നത്തിന്റെ പരിഹാരവും അത്ര എളുപ്പമായ കാര്യമല്ല.

“പ്രകൃതിയിലുള്ള എല്ലാ വസ്തുക്കള്‍ക്കും ഓരോ നിയമം കര്‍ത്താവ്‌ കൊടുത്തിട്ടുണ്ട്‌.” ആ നിയമം അനുസരിച്ച്‌ ജീവിക്കുമ്പോള്‍ ചിലര്‍ AIDS പിടിച്ചു് ചാവുന്നു. ചിലരെ മനുഷ്യര്‍ ചുമ്മാ തല്ലിക്കൊല്ലുന്നു. ചിലര്‍ തല്ലിക്കൊന്നവരെ സംരക്ഷിക്കാന്‍ നോക്കുന്നു. അവരെ സംരക്ഷിക്കാന്‍ മറ്റുചിലര്‍ “വിധി വിധിയോ വിധി വിധി” എന്നു് വിളിച്ചുകൂവിക്കൊണ്ടു് കൊടിയോ, വടിയോ, കാവടിയോ, കൊട്ടുവടിയോ അല്ലെങ്കില്‍ കയ്യില്‍ കിട്ടുന്നതും, എടുത്താല്‍ പൊങ്ങുന്നതുമായ മറ്റേതെങ്കിലും വീട്ടുപകരണങ്ങളോ വലിച്ചുചുമന്നു് വട്ടത്തിലും നീളത്തിലും ച‍തുരത്തിലും നെട്ടോട്ടം ഓടുന്നു. എല്ലാം പരമേശ്വരന്‍ കര്‍ത്താവിന്റെ ഒരോരോ നിയമങ്ങള്‍!!

മനുഷ്യാവകാശം?

Mon, 05 Oct 2009 14:24:29 +0100

1. അമ്മയെ സഹായിക്കാന്‍ കല്ലുചുമക്കുന്ന പിഞ്ചുമകൾ

2. ജീവിക്കാന്‍ വേണ്ടി താങ്ങാനാവാത്ത കല്ലുകള്‍ ചുമക്കേണ്ടി വരുന്ന ബാലന്‍‍

മനുഷ്യാവകാശം ഇല്ലാത്തവര്‍:

അമ്മമാരും മക്കളും! ജീവിതത്തിന്റെ മൌലികമായ അനിവാര്യതകള്‍ക്കുവേണ്ടി ചോര നീരാക്കുന്നവര്‍. അവരെ സഹായിക്കാന്‍ ദൈവമില്ല, മനുഷ്യരില്ല. അവര്‍ക്കു് അവര്‍ മാത്രം! പൊട്ടിക്കുന്ന കല്ലിന്റെ അളവിനു് കിട്ടുന്ന കൂലി. എത്രനാള്‍ അദ്ധ്വാനിക്കുന്നുവോ അത്രനാള്‍ ജീവിതം. മനുഷ്യാവകാശങ്ങള്‍ എന്തെന്നു് അറിയാത്തതിനാല്‍ മനുഷ്യാവകാശലംഘനത്തെപ്പറ്റി പരാതികളുമില്ല! പരാതി ഉണ്ടായാല്‍ പോലും വാദിക്കാന്‍ വക്കീലില്ല, വാദം കേള്‍ക്കാന്‍ കോടതികളുമില്ല. മന്ത്രിമാരേയും ഉദ്യോഗസ്ഥന്മാരേയും വിലയ്ക്കെടുത്തു് തങ്ങള്‍ക്കു് അനുകൂലമാക്കാന്‍ തുടുത്ത അവയവങ്ങളോ മുഴുത്ത പണസഞ്ചികളോ ഇല്ല. ഇതുവരെ “ദൈവത്തിനു്” എന്തെങ്കിലും കൊടുത്തിട്ടുള്ളതല്ലാതെ ദൈവത്തില്‍ നിന്നും ഒന്നും ലഭിച്ചിട്ടില്ലാത്ത അവരെ പാപമോചിതരാക്കി “ദൈവമക്കളാക്കാന്‍” ചിലര്‍ ഇറങ്ങിത്തിരിച്ചിട്ടുണ്ടു് എന്നാണു് കേള്‍വി. അതു് നന്നായി. മരണശേഷമെങ്കിലും അവര്‍ സ്വര്‍ഗ്ഗത്തില്‍ എത്തുമല്ലോ! പാറപൊട്ടിച്ചു് ഉണ്ടാക്കുന്നതിന്റെ ഒരംശം പിടിച്ചുപറിക്കാനും, പിച്ചച്ചട്ടിയില്‍ കയ്യിട്ടുവാരാനും ഒക്കെ വേണം ഒരുതരം ദൈവവരം (തൊലിക്കട്ടി എന്നു് പച്ചമലയാളം)! വിധവയുടെ ചില്ലിക്കാശു് ആയാലും കിട്ടുന്നതു് പോന്നോട്ടെ! പണത്തിനു് ദുര്‍ഗ്ഗന്ധമില്ല, അയിത്തമില്ല, ജാതിയില്ല, മതമില്ല, ലിംഗമില്ല.

മനുഷ്യാവകാശം ഉള്ളവര്‍‍ (അഥവാ, മനുഷ്യാവകാശം പിടിച്ചുവാങ്ങാന്‍ ശ്രമിക്കുന്നവര്‍):

(സിസ്റ്റര്‍ അഭയയുടെ കൊലപാതകത്തില്‍ പങ്കുണ്ടെന്ന സംശയത്തിന്റെ പേരില്‍ അറസ്റ്റ് ചെയ്യപ്പെട്ട) സിസ്റ്റര്‍ സ്റ്റെഫിയുടെ കന്യകാത്വം പരിശോധിച്ചതു് മനുഷ്യാവകാശലംഘനമാണെന്നു് സിസ്റ്റര്‍ ജെസി കുര്യന്‍. - വാര്‍ത്ത

അഭയാ കേസുമായി ബന്ധപ്പെട്ട്‌ സിസ്റ്റര്‍ സെഫിയുടെ കന്യകാത്വ പരിശോധന റിപ്പോര്‍ട്ടു പുറത്തുവിട്ട നടപടി വൈദ്യശാസ്ത്ര നീതിക്കു നിരക്കാത്തതും മനുഷ്യത്വരഹിതവുമാണെന്നു വിദേശരാജ്യങ്ങളിലടക്കം മുപ്പതു വര്‍ഷത്തിലേറെയായി സേവനം ചെയ്തിട്ടുള്ള പ്രമുഖ ഗൈനക്കോളജിസ്റ്റ്‌ ഡോ. മേരി മാഴ്സെലസ്‌ അഭിപ്രായപ്പെട്ടു. - വാര്‍ത്ത.

മനുഷ്യാവകാശലംഘനം കന്യാചര്‍മ്മപരിശോധനയ്ക്കു് മാത്രമാണോ ബാധകം എന്നറിയില്ല. മനുഷ്യാവകാശം ഇല്ലാത്തതുകൊണ്ടാണോ നിരപരാധികള്‍ കൊല്ലപ്പെടുന്നതും, കളിച്ചുനടക്കേണ്ട കുട്ടികള്‍ കല്ലുമടകളില്‍ പാറപൊട്ടിക്കുന്ന ജോലിയില്‍ ഏര്‍പ്പെടേണ്ടിവരുന്നതെന്നും അറിയില്ല. അത്തരം കാര്യങ്ങളെപ്പറ്റി വിശദവും വ്യക്തവുമായി അറിയാവുന്ന പലരും അഭയയുടെ കൊലക്കേസിലെ പ്രതികളെ സംരക്ഷിക്കാന്‍ ശ്രമിക്കുന്ന സ്ഥിതിക്കു് അവരിലാരെങ്കിലും ആരോരുമില്ലാത്ത ഈ അഗതികള്‍ക്കുവേണ്ടിയും രംഗപ്രവേശം ചെയ്താലോ എന്ന പ്രതീക്ഷയാണു് ഈ പോസ്റ്റിനാധാരം. പദവിയും കാര്യവിവരവും ഉള്ളവര്‍ ഇടപെട്ടാലല്ലേ എന്തെങ്കിലും നടക്കൂ!